מורי ורבותי! ס'איז שױן דורך די שבעת ימי משתה פֿון דער ערשטער געבורטסטאָג פֿון דער אתרא קדישא הדין און מיר װילן מיר װאַרעם באַדאַנקן דער וועד השמחה װאָס האָט צוגעשטעלט מילים כּדרבונות און מער װי אײן עט סופֿר מהיר. ר' אײַזיק, ר' קטינא, ר' יושב על הגדר וכל הקהל הקודש וגם לרבות דער כּביכול אַלײן האָבן זיך אַלע אָפּגערופֿן מיט אַ ברײט האַרציקײט און אונדז מהנה געװען בטוב לבם מיט חידודי דאורייתא. אַ דאַנק אױך פֿאַר די װאָס האָבן אַרײַנגעשיקט פּריװאַטע חידושים. איך װאַרט נאָך אױף אײן הבטחה און מיר װעלן אַלעס מערטשעם אָפּדריקן.
ישלם ה' פּעלם ותהא משכּרתם שלימה און אם ירצה ה' בײַ אײַך אַלע, כּולל דער פּה מפּיק מרגליות, ר' יאַנקל, אױף שמחות בקרוב ובניקל, און צו ר' יאַנקל בפֿרט זאָג איך כּל המתפּלל בעד חבירו והוא צריך לאותו דבר הוא נענה תחילה.
עהעם העם. מורי ורבותי מיר האָבן טאַקע צוגעזאָגט אַז מען מאַכט נישט קײן אַפּיעל אָבער, אַנטשולדיקט איר קענט בלײַבן זיצן, אָבער עת לעשות לה. איך װעל אײַך לאַנג נישט אױפֿהאַלטן און מען גײט שױן טײלן דער פֿלײש אָבער הערט אױס נאָך אַ מינוט.
מע דערצײלט אַז דער הײליקער רבי ר' זושא זכיסע יאָגן אָלײַנע האָט אַמאָל אױפֿגעהױבן די אױגן צום הימל און געזאָגט 'זישע דאַרף געלט'. ס'איז נישט דורך אַ שיעור הילוך מיל און ס'האָט זיך אױפֿגעמאַכט דער דאַך און ס'איז אַרײַנגעפֿאַלן אַ זאַק גאָלדענע מטביעות. מיר זענען לײדע נישט שטיב מענטשן בײַם פּמליא של מעלה און מיר מיזן זײַן אַ תובע בפּה אױף אַן העפֿטלעכערער אופֿן. מיר פֿאַרמאָגן אױך נישט אַ ברודער װי דער נועם אלימלך װאָס זאָל אײַנטײַטשן לײַכטע פּסוקים צו מאַכן שװערע קעשענעס. (זעט נועם אלימלך פּר' קורח אױף לא חמור אחד נשאתי מהם.) הרבה דרכים למקום און מיר מײנען בײדע דאָס זעלבע, ממילא הײבט זיך אָן אונדזער בקשה מיט ברם דא עקא אין הקומץ משביע את הארי וכו' וכו'
נמנו וגמרו אַז טוב לא לאדם שלא יכתוב משיכתוב ועכשיו שכּותב ימשמש בכּיסו ואיכּא דאמרי יפּעטשע מעטשע בכּיסו. ואם אין אתה נותן בגיני תן בגין אשתי ואם אין אתה נותן בגין אשתי תן בגין בני ובנותי אָבער אַעיקר תן און אחד המרבה ואחד הממעיט... וכל המוסיף מוסיפֿין לו.
מורי ורבותי, מען טײלט שױן אָט אָט דער פֿלײש, מיר װילן נאָר קודם װאַרעם באַדאַנקן די מיטאַרבעטער פֿון דער באַװעבטער ייִד כּל אחד בשמו הטוב יבורך װאָס טון זיך מטריח זײַן צאַמצונעמען די הבטחות פֿאַר אונדזערט װעגן. די װאָס װילן זײַן אַ מתן בסתר קענען אָנזאָגן מיט זײערע פּדיון אַז מען זאָל נישט אַרײַן טראָגן צום רבין זײערע נאָמן און ס'װעט שטײן אױפֿן קװיטל בלױז עבדך בן אמתיך.
אין דעם זכות זאָלן מיר זיך קענען מחזק זײַן און שרײַבן בלאָגס עד בלי די װי די משנה זאָגט אם אין פּײפּאַל אײן בלאָגס, אם אין בלאָגס אין פּײפּאַל.
בבלוג זה
בכל הבלוגים
